من هي إسراء عبدالهادي؟

  حوار الصحفية: أشرقت سعيد.

عرفيني بنفسك؟ 

أنا كابتن إسراء عبد الهادي محمد مدربة في نادي 6 اكتوبر وكنت لسة مخلصة بطولة ف Jr NBA.

كنت ماسكة سن 2009/2008 والحمد لله طلعت بيهم تالت المجموعة وجبنا مادلية الحمد لله فـNpA والبطولة خلصت ومستنيين إن شاء الله الجديدة وحاليا انا مدربة في اكاديمية في نادي 6 اكتوبر، كنت الأول بلعب كرة سلة يعني 17 سنة بلعب كرة سلة.

بدأتي مشوارك أزاي؟

بلعب وانا عندي 7 سنين كانت ف نادي النيل من سن 7 لغاية 14 سنة واخدت بطولات في نادي النيل طلعنا اول جمهورية ف سن 12 سنة طلعناها مرتين كنا بنلعب ماتشات three on three وكنا بنكسب الحمد لله كانت فرصة كويسة جدًا ليا فـي نادي النيل اللي أنا اتعلمت فيه هناك على ايد مدربين كتير وساعدوني كتير اوي وساعدوني ابقى مساعدة في كرة السلة خدنا على ايديهم بطولات كتير، زي كابتن اسامة السيد، وكابت السيد، وكابتن أحمد كامل هو رئيس كرة السلة حاليًا، ولعبت وانا 14 سنة في الجزيرة لعبت سنتين بس ملعبتش 18 سنة لعبت درجة اولى على طول من الجزيرة على نادي ف6 اكتوبر ولعبنا هنا في اكتوبر برضو بطولات كتير لعبنا ممتاز(ب) وممتاز(أ) وكسبنا منطقة الجمهورية كتير.

كم مرة طلعتي مركز أول؟

مرتين مرة طلعنا فيها أول ومرة طلعنا مركز تاني واتصعدنا لممتاز(أ) وأنا حاليًا مدربة في نادي 6 اكتوبر وإن شاء الله فرصنا بتبقى احسن وبتبقى كويسة جدًا 

أي الصعوبات اللي واجهتك في بدايتك مع كرة السلة؟  

وانا صغيرة مكنش فيه صعوبات لأن كرة السلة مكنتش قوية زي دلوقتي بس لما ابتديت اكبر شوية ولعبت في الدرجة الاولى كنت حبيت اوصل للمنتخب بس للأسف مفيش وسطة فـهي دي الصعوبات اللي بتقابلنا لو انتي معندكيش واسطة فأنتِ بتتظلمي. 

من وجهة نظرك كرة السلة مظلومة إعلاميًا من ناحية السيدات ولا الرجال؟ 

هي مظلومة إعلاميًا من ناحية السيدات لأن في مدربات سيدات كتير ومغيش حد ظاهر فيهم وعندنا لاعبات كويسين جدًا بردو مش ظاهرين فللأسف التركيز كله على الولاد والمدربين الرجالة وحتى الإداريين والسفريات كلها رجالة مفيش سيدات فإحنا كمدربات مظلومين جدًا جدًا في كرة السلة.

حابة تشكري حد في مسيرتك التدريبية؟ 

ماما كانت بتشجعني جدًا وأخواتي كانو بيشجعوني جدًا وماما كانت مهتمة اني العب باسكت وانا بشكرها حقيقي والمدربين بقه زي ما قلت ف الأول كابتن اسامة السيد ده هو اللي علمني اساسيات اللعب وفضل معايا لحد 14 سنة وباقي المدربين اللي قلت عليهم فدول اللي اتعلمت على ايديهم كرة السلة.

وبعدين قابلوني ناس كتير وكإداريًا بقه كابتن نسرين بجد هي شخصية محترمة جدًا وجدعة هنا في اكتوبر انا قابلني مدربين كتير اتعاملت مع كابتن احمد رضى وكابتن أحمد سلامة الجلاني وكابتن أكرم وكابتن هدهود كان رئيس الجاز مفيش معلومة كان بيبخلها عليا يعني عكس مدربين كتير.